Vinagarður leikskóli KFUM og KFUK er sjálfstætt starfandi kristilegur leikskóli, staðsettur í Laugardalnum í Reykjavík. Leikskólinn var stofnaður 17. nóvember 1975 og starfaði í Langagerði 1 í rúm 26 ár. Hann flutti á Holtaveg 28 í Reykjavík 2. apríl 2002 og hlaut þá nafnið Vinagarður.

Leikskólinn Vinagarður byggir starf sitt á kristilegum grunni þar sem lögð er áhersla á að efla kristið siðgæði og veita trúarlegt uppeldi sem byggir á gildum skólans um trú, von og kærleika. Skólastarfið er skipulagt í samræmi við aðalnámskrá leikskóla, þeim lögum og reglugerðum sem eiga við um börn og leikskólastigið, menntastefnu Reykjavíkurborgar og Barnasáttmála SÞ.Í starfi leikskólans er lögð áhersla á að börnin læri um náttúruna og að bera virðingu og umhyggju fyrir henni jafnt og öllu því sem Guð hefur skapað. Vináttan í víðum skilningi þess orðs er rauður þráður í starfi leikskólans og eitt af sérkennum hans.

Skólinn er fyrir börn frá 18 mánaða aldri og skiptist í 4 deildir eftir aldri barnanna.

Leikskólastjóri er Hulda Björg Jónasdóttir og má fá allar nánari upplýsingar hjá henni í síma 553 3038. Einnig er öllum velkomið að koma í heimsókn til okkar eða senda okkur tölvupóst á vinagardur@vinagardur.is.

Hægt er að sækja um leikskólapláss hér á vefnum.

Skólanámskrá Vinagarðs 2024

Reglur um leikskólaþjónustu Vinagarðs, leikskóla KFUM og KFUK

Svona vinnum við

Í leikskólanum er stutt við nám og þroska barna með áherslu á leikinn. Endilega kynnið ykkur skólanámskrána hér að ofan en þar er að finna nánari umfjöllun um eftirfarandi atriði:

Hugmyndafræði

Til viðbótar við kristilegan grunn skólastarfsins sækjum við hugmyndir um mikilvægi námsumhverfis til John Dewey og Mihaly Csikszentmihalyi, mikilvægi samskipta til Berit Bae og um mikilvægi þess að upplifa öryggi, vellíðan og sjálfsstjórn úr Uppeldi sem virkar – Færni til framtíðar sem byggir á Christophersen og Mortweet.

Starfsaðferðir

Leikskólinn er lærdómssamfélag barna, starfsfólks og foreldra þar sem allir hafa eitthvað til málanna að leggja, hugarfar er inngildandi og virðing borin fyrir einstaklingum og fjölbreytileika samfélagsins. Sjálfsprottinn leikur er í forgrunni þar sem viðfangsefni og námsumhverfi hvetur börnin áfram, eflir þau í trú á eigin getu, þekki styrkleika sína, virki sköpunarkraftinn og þrói með sér jákvæð viðhorf til náms.

Læsi og samskipti

Í Vinagarði er unnið með læsi í víðum skilningi þar sem margbreytileiki tungumálsins og möguleikar þess eru sjáanleg í umhverfi barnsins. Börnin hlusta á sögur, ljóð og ævintýri, semja eigin frásagnir þar sem þau endurskapa og deila upplifun sinni og hugmyndum um eigið líf, samfélag og menningu. Sjá nánar hér: Læsisstefna Vinagarðs

Sköpun og menning

Í Vinagarði er skapandi starf grundvallarþáttur í námi og þroska barna þar sem gleði, könnun og tjáning er í forgrunni. Efniviður er opinn og börnin nýta hugmyndaflugið í útfærslu sinna verkefna. Tónlistarstundir og söngur er ríkur þáttur í leikskólastarfinu, sameiginlegar söngstundir eru alla föstudaga auk þess sem allar deildir syngja daglega hver fyrir sig.

Sjálfbærni og vísindi

Vinagarður býr við einstakt nærumhverfi sem er beintengt við náttúru og dýralíf. Í rannsóknargönguferðum eru tækifæri til að skoða fugla og skordýr, jurtir og tré, skoða tölur, tákn og mynstur, fjarlægðir og áttir. Þemavinna leikskólans um moldina, vatnið og loftið er mikil uppspretta tilrauna með þessi efni og eiginleika þeirra.

Heilbrigði og vellíðan

Í Vinagarði grundvallast heilbrigði og vellíðan barna á kærleika og umhyggju. Starfsfólk leggur sig fram um að rækta tengsl við og á milli barnanna og stuðla að tilfinningalegu jafnvægi hvers barns. Stór útisvæði bjóða upp á fjölbreytta hreyfingu og krefjandi útivist oft á dag, oftar en ekki á opnu skógarsvæði þar sem athafnafrelsi barnanna er mikið.

Lýðræði, mannréttindi og jafnrétti

Starfið í Vinagarði hvílir styrkum stoðum á vináttunni sem er ein megináhersla skólans. Börnin læra að í sannri vináttu ríkir virðing fyrir vali og styrkleikum annarra, að þar þarf að ríkja skilningur á réttindum þeirra sjálfra og samspili við réttindi annarra. Í jafnréttisáætlun er megináherslan er á að efniviður endurspegli fjölbreytileika, að hugað sé markvisst að hlutdeild allra í barnahópnum og að orðræða og hlutverkaskipting í leikskólastarfinu vinni gegn staðalmyndum kynjanna,